以下是我和同事們與正生同學升班面談後的感想 (Revised version)
2011升班面試後有感 請大家唔好重覆以下笑話，如能充份實踐以下笑話的全部內涵，這就是人生一大悲劇!
1.
睇書學游水，最終只會攞埋本書一齊浸死
2.
書本係死人係生嘅! 要嘗試活出書本的知識!
讀聖經永遠比‘行’聖經易很多! 付諸實行永遠都係最難嘅第一步
3.
做個好人比做個壞人難；增肥容易減肥難；你可以用一個鐘 “洗完”五佰蚊，但係好可能你阿媽要做番起碼10 個鐘先至賺番五佰蚊，所以唔好亂叫你屋企人買嘢!
4.
先求祂的國祂的義，其他一切上帝會供應……
5.
唔知乜嘢係最低學歷，呢個世界係冇話乜嘢係最低學歷，你可唔可以講出乜嘢叫低乜嘢叫高?
6.
全村學生都想做社工，社工已經到達氾濫嘅程度!!
7.
點解平時講嘢咁大聲，上到台就‘騰晒雞’?
8.
同學說: 書到用時方恨少，然後又說: 求學不是求分數……用廣告式口吻回答問題只會有隔靴搔癢之效 (搔極都仲係痕!)
9.
有時明知人哋喺度搵緊你笨你都甘心樂意比人呃，咁就叫肯蝕底係高尚情操;相反，經常比人搵笨都唔知就嘅要檢討一吓點解
10.
年青人要先學蝕底先至學搵錢但千祈唔好學‘搵人笨’，“一次不忠，百次不用”喱句話係好真實嘅‘肺’話
11.
一個鍾意嘥時間嘅人去到邊都會諗辦法嘥時間，一個鼻哥窿臭嘅人聞乜嘢都係臭嘅!
12.
唔好以為自己係一架直升機可以‘直升’，要了解大部份人係一架飛機------要喺‘助跑線’起動先至可以起飛
13.
‘羊毛出自羊身上’既耳熟又能詳，就算你係一隻羊都未必一定可以攞翻自己嘅毛，其實你很多時候都係你‘朋友’嘅‘羊牯’(容易上當嘅人)
14.
同學說：個個都好假令到我想走，同工回答：想好嘅弟兄要走唔想學好嘅弟兄要留，喱Ｄ就係經濟學嘅‘劣幣驅走良幣’？要走嘅係你講嗰Ｄ好假嘅弟兄而唔係你，試吓下定決心做一個有誠信嘅人
15.
樣樣都快就冇嘢係快! 唔好要求自己十項全能，但要嘗試掌握至少兩樣專長，仲要保持恆久的學習動力，咁就冇咁易被社會淘汰
16.
弟兄，你飲醉了，你知唔知喺度講緊咩 (一個中三成績欠佳嘅弟兄想離村先幫老豆做半年廚然後再讀書將來做一個社工，他說做社工唔須要特別學歷，宜家成績唔好可以報吓其他嘅“Course”??，席間有社工背景MiChael 同Tony 一時語塞唔知點樣應對…
17.
同工問同學: 點解你成績會咁差? 同學滿有自信地回答說他都諗住就嚟走，無謂嘥時間溫習……這是投機嘅心態
18.
同工教導同學‘順服’嘅功課，所以同工要求同學好多時情都‘跟’咗先 (即先回應同工嘅要求、唔好死拗或爭辯)，可惜同學係學D唔學D，同學宜家係會跟咗先，不過係跟咗D衰嘢先，唔會死拗 (唔同自己嘅良心死拗)!
這點可解釋為何同學經常話自己容易比人影響
19.
很多有心嘅同學第時想做社工，原因是想藉著個人由‘谷底反彈’的相關經歷為身陷‘毒’海年青少年早日脫離苦海……同工答‘幫人’乃勞心勞力嘅工作，偶一不慎會遍體鱗傷、走火入魔、更有機會誤人誤己，後果不堪設想，要諗清諗楚……
20.
未必一定要吸過毒先至可幫D 濫藥青少年; 正如冇患過癌嘅醫生都可以係一個出色嘅腫瘤科專家，很多愛滋病嘅專家本身都唔係一個愛滋病患者……最緊要係你有冇 ‘heart’ 去服務你嘅對象……
21.
警察故事裡嘅成龍同現實中嘅差人唔同，唔好睇完警察故事就去考差人
22.
可以幫人係 ‘恩典’，受人恩惠亦要感恩
23.
輸打贏要即係‘公我贏，字你輸’世上冇乜幾種遊戲係必贏嘅，賭場例外……
24.
做朋友唔係要同佢攬住一齊死，而係點樣阻止佢唔會因自己而死 (或者幫佢逃出生天、出死入生)!
25.
要同你攬住一齊死嘅唔係你嘅朋友，而係一個炸彈或者係一個穿咗窿嘅水泡! 你要防止自己成為別人嘅炸彈或穿窿水泡，當見到一個炸彈或者穿窿水泡都去攬嘅話就祝你好運!
26.
乜嘢係義氣，諗吓世界上邊個會為你付出無條件的愛，我相信一定唔會係你嗰D‘義氣’朋友
27.
一個人不能侍奉兩個主，究竟‘關公’會幫差人定係社團人士
28.
諗一諗點解有人會‘願意’替人‘頂罪’，他們得到了什麼? 是他們偉大嗎? 像德蘭修女嘅偉人已經絕無僅有，但我亦肯定她唔會替人頂罪! 若你能認識到像德蘭修女嘅偉人，
29.
請重新界定咩嘢係‘朋友’，建築喺利益上嘅朋友充其量都只係你嘅雙邊‘貿易伙伴’，即係有利益往來才能維繫!
30.
老細絕對會欣賞你的態度行為責任心，同樣地你所服務嘅公司亦需要你嘅學識能力技能去滿足公司的業務發展
31.
技能都是學識的一種! 世界上有冇d 係冇知識成份嘅技能存在? 知識係邊度嚟?
32.
冇知識成份嘅技能係自相有如一杯熱嘅凍檸水，自相矛盾!
33.
宜家技能貶值奇快，今天的技能好可能喺不久嘅將來嘅‘無能’，所以重視技能亦應重視不斷學習!
34.
上堂不等如學習、有什麼技能不需要經過學習的階段? 放棄學習並沒有掌握技能可言!
35.
有料可以有多些選擇、冇料嘅只有不情願地被選擇 (或被安置!)
36.
‘料’即係 德、智、體、群、美、靈嘅 ‘總和’!
37.
冇嘅時候你識問人攞，當你有嘅時候又會唔會甘心情願地攞翻D 出嚟分比人!
38.
“我需要學識但唔需要學歷，我唔鍾意返學但係鍾意學嘢”諗諗以上內容有冇問題
39.
讀書要等有氣氛先讀不如等D 錢喺樹上跌落嚟
40.
冇錢嘅時候就支持共產主義 (食大鍋飯)，但有錢嘅時候就係資本主義 (保障私人財產)嘅忠實粉絲
41.
學校有種傳統‘自然升班’現象，相反外出職場係冇自然‘升職’喱套!
42.
一個好嘅社工會幫到好多人，相反一個變態嘅社工會害死好多人，咁你要諗諗你仲做唔做社工!
43.
一個能力正常但心態行為正面嘅人比一個能力卓越但心態歪劣的人對社會更有貢獻更有建樹!
44.
沒有絕對嘅平衡，只有‘合理’嘅失衡! 唔好以為將一樣嘢平分一半就代表係‘平衡’
45.
理論上男女數目大致比例相同，但你有冇留意大型商場睇睇男女廁格嘅數目是否相同!
46.
諗諗‘公平’同‘均等’嘅分別? 做又36唔做又36 係唔係叫做公平?
47.
‘平衡’ 好似音樂、電影、水彩畫般係藝術項目而不是一門算術! 識計數/計數叻不等如識去‘平衡’!
48.
人類壽命平均可達80，但不是人人都會喺80
歲先至死!
49.
你諗清楚，什麼叫‘諗清諗楚’?
50.
黑暗嘅人令地方變成黑暗! 冇人嘅地方就沒有黑暗的地方!
51.
你想做一個中學生定係一個有中學學歷/能力嘅學生!
52.
中華民國總統(台灣省領導人)馬英九話: 現代人都應該要有文明人嘅頭腦同埋野蠻人嘅體格，不幸嘅係很多好有情緒嘅人都唔係好文明但同時又係好野蠻
53.
老師教晒唔等如學生學晒，學生識晒亦唔代表學咗嘅都記得晒，就算記得晒都未必運用得晒……
54.
睇聖經或教科書比起跑馬拉松、耕田、做苦力能消耗更多‘卡路里’因為很多人睇兩眼就會瞓著! 所以最好嘅安眠藥係聖經同教科書
55.
個個人都識講做社工，但社工唔係一份只要求‘齊講嘅工種’還是一項須持續動身起行嘅承擔！
56.
有學識可以比你有更大空間選擇你想要嘅工作去做，但係都係要做，而且可能還要做得更多更多，所以唔係讀完書就唔駛做嘢
57.
靠把口搵到食嘅人唔多，你得嗎？你以為你係許冠文定黃子華？你知道他們未成名前捱了多久付出過多少汗水！他們付出的比上台講的更多更多……
58.
正生會唔係叫你喺度淨係讀書，同樣地冇叫你去‘焚書’同停止去學習，學做人同埋讀書都係教育的一部份，兩者環環相扣。打個比喻，‘進食’係包括咀嚼及吞嚥，有咀嚼冇吞嚥或者有吞嚥冇咀嚼都唔算係完整嘅‘進食’!
59.
讀書唔係叫你不惜放棄身邊一切去追求10 A嘅回報，畢竟考到10 A 嘅人唔多，但你可以唔比自己科科攞U ! 前者涉及天時地利人和，而後者就是態度的問題，一般都可以靠自己控制!
60.
沒有根基的盲目學習只會係另一項豆腐渣工程，雖然係工程，但有什麼‘風吹草動’，就會即冧／散，死傷更嚴重
61.
成日講堅持嘅人答唔出為什麼要堅持
62.
讀書能力都係一種‘技能’! 技能係從哪裡來? 技能是從天上來嗎? 技能是從樹上來嗎
63.
一個好憎讀書嘅人為咗做消防員宜強迫自己讀書，如果‘讀書’幫唔到你做消防員，你會唔一世都唔再讀書? 你會唔會認為‘讀書’出賣咗你?
64.
最嘥時間唔係喺正生，而係以前用咗唔知喺邊度嘅時間，不過這些都已經係你嘅沉沒成本 (Sunk
cost)，都係攞唔翻、追唔到、追到都嘥氣! 不如向前看、諗諗你有乜資本，冇嘅唔該諗諗辦法，唔好淨係識巧取豪奪攞人D 資本來滿足自己所求!
65.
諗諗‘炒英泥’可以學到咩嘢?
66.
‘同流’係咪可以唔‘合污’? 人哋假嘅時你可以唔學佢哋一樣
67.
成日諗住以前咗嘅時間就係嘥緊宜家嘅時間!
68.
世上冇免費嘅午餐，如果你喺度有幸食‘免費午餐’，唔該你諗諗背後有邊個人幫你埋咗單! 飲水要思源
69.
入咗邊個部門就想從事嗰個部門嘅相關職業: 便即刻想成為?? 入電腦房想做電腦嘢、學散打想做打手、學籃球想做NBA 球星、踢足球想踢世界盃、入黑房想成為攝影師、煮飯想成為廚師、炒英泥打沙搬石想成為工程師起橋修路補城牆、做清潔想做清道夫、搭街渡又想成為船家……有夢想都要有實力先得，諗諗你而家有嘅‘實力’同埋點增強你未來嘅‘實力’! 得個諗頂多只係一個‘思想家’…… 請快D 坐言起行
70.
技能訓練不等如純粹職業訓練，學技能可發掘自己所長、認識自己、培養良好工作態度
71. 有同學說： 用人手殺草不合乎成本效益，正生會看待學生不在乎成本效益，點解要咁多同事見一個同學？
點解唔每個月趕走三個學生? 諗諗點解要搵你去殺草，答案你自己講但我可以肯定同工一定唔會當你係機器咁用
72.
正生會理念不只看成績、更重視行為生活態度! 這句話沒錯，但正生會亦鼓勵同學追求卓越，比自己成績退步漠視學業自甘墮落就係違反追求卓越嘅精神，亦唔係一個有‘堅持’態度 嘅人?
73.
埋堆吹水扮嘢想過喺度日子過得舒服D，如果你成日咁做就千祈唔好問點解喺正生冇嘢學
74.
‘選擇你所嘅愛’難定係‘愛你所選擇嘅難’? 選擇難還是堅持難? 而家係咪選擇太多堅持太少?
75.
好多同學笑住嚟面試但喊住咁走
76.
犯咗事未比人拉唔代表冇衰只係好彩，唔好諗住你一世都咁好彩
77.
同你隔離同學講‘愛拼才會贏’講多句: 拼咗都未必會贏
78.
同學，我哋係地球人，請你唔好用外星話作答
79.
不要愚蠢地私下跟友好同學訂下 ‘物品互用盟約’即係喺某一時間內與某人共用某些日常用品主要為鞋櫃、衣櫃、書櫃等，一旦日後換位後，那些共用中嘅‘鞋櫃’‘衣櫃’歸於誰人等問題將‘內戰’(利益衝突) 嘅催化劑
80.
你以前同慈禧太后簽嘅條約，慈禧駕崩咗，孫中山係唔會理你嘅! 宜家大陸都用緊人民幣，唔好再用D 幾十年前嘅日本軍票嘞……
81.
D 嘢唔係你就唔係你，無論你借嚟用咗幾耐都唔會變成你嘅， 諗諗你搭咗幾十年嘅地鐵都唔會變成你嘅私人財產
82.
當你有一日離開服務緊公司，法律上你唔可以帶走公司嘅公家嘅物件，但係你可以攞走公司內最寶貴嘅資產 --- 就係你嘅工作經驗及相關學識，以上兩件東西嘅多寡與你喺公司嘅工作投入度成正比。所以喺公司內渾渾噩噩嘅人喺唔會喺公司內得到任何資產
83.
上課表現不應與生活表現脫軌
84.
同人嘈交後，心情欠佳，然後搵人鬧，這樣既不能解決嘈交背後嘅問題亦不能解決個人情緒問題，這極其量都只能 ‘延緩’ 問題! 飲美沙酮點可以成功戒毒? 美沙酮 (Methadone) 跟‘毒品’又有什麼本質上嘅分別? 我哋可以食牛丸戒牛肉，可以嗎?
85. 打回原形，恆生指數經歷13年後打回原形，唔係教有家炒股票因為我都唔識，我想講嘅係做人梗係會有高有低好，但希望大家嘅人生嘅方向唔好只係有波幅冇升幅，更唔好喺正生裡經歷數載刻苦鍛鍊然後將畢業時’打回原形’回復自己剛入村一樣嘅模樣。希望大家有一個‘有波幅更有升幅’ 的人生。切記唔好讓自己喺正生 ‘又蝕價又蝕時間值’這笨絕得很。
86.
我哋成日想搵方法逃避，但諗深一層“逃避”本身亦都係逃避唔到! 例如某君想借酒消愁忘記悲傷，這樣做或許可以暫時逃避傷痛但我哋係唔可能逃避 “借酒消愁忘記悲傷”這種逃避手段! 既然‘逃避本身’係逃避唔到，不如乾脆面對‘它’吧! 同學唔好逃避了!
87.
我們不能為自己接生，同時又不能幫自己執骨，‘假手於人’ 有時係避無可避!
88.
同學因皮膚敏感唔食得蛋，但佢又強調食蛋糕冇問題嗎? 這‘思路’有問題嗎?
89.
個個都好驚悶，其實究竟係好驚冇嘢做定係悶本身? 宜先了解 ‘悶’ 是什麼? ‘悶’呢樣係好‘個人’嘅! 有人鍾情於長跑，但又有人覺得個人長跑好悶; 有人覺得釣魚好自由但又有人覺得釣魚是極無聊之玩意! 所以當感到悶嘅時候，我哋要諗諗究竟原因係自己冇嘢好做定話心靈空虛? 然後再問自己點解會‘悶’? 點解自己會冇嘢做? 點解心靈又會咁空虛呢? 沒找到問題或對問題視若無睹的話係永遠唔會解決到個‘悶’嘅問題! 然而有D 解悶嘅方法本身都係好‘悶’，所以要慎防‘越解越悶’。 所以如果下次覺得悶時咁點算? 咪面對佢囉! 如果悶唔悶，可能都是心態問題，調節吓可能好D!
90.
同學仔有感化令在身同時‘瀕臨’上court ‘邊緣’ 但又無時無刻扭盡六壬企圖(逃)出校園搵學校讀書? 呢d 係咪叫‘好古惑但好又天真又好傻’! 不如決心留在正生改過吧!
91.
點解食多咗嘢會冇感覺，但食少咗就總係好覺? 開工好疲倦但係玩就好精神! 點解?
92.
喺度只為了守完感化令為個‘指導原則’，若這是做的原則，這極其量只是最低層次的‘原則’
待續
沒有留言:
張貼留言