彥呈啊！ 彥呈！

我有同感，題目讀音確實有D 怪，但怪的東西背後通常都很有意思亦很有意義。

楊某人 (即本人又係中國人又係香港人同時係九龍人及新界人更希望有生之年成為一個好人) 育有一子，他出生於2006 年11月。 佢同我一樣都係姓楊，取名彥呈。讀音有少許騎呢，但我貪佢有意思且充滿玄機（絕對不是天機，因為天機不可洩露，真心不能制造！有時我很老土，彷如一台爐灶）。
那麼，為什麼會用彥呈兩字？　我嘗試作粗略解說：
　　
楊＝　唔駛多講，本人姓氏
彥＝　才學、才華、文采、才德 (才德是才能 + 品德，兩者必備! )
呈＝　貢獻，呈上、獻給，敬獻

據我患有近視嘅肉眼觀察，中國人改名好多時都受到‘我冇我都想我下一代有’的愛子觀念所影響。所以經對號入座後，小兒的名字正正突顯楊某人才德之匱乏及思想上的吝嗇。 所以我希望兒子長大後能把自己才能，才華貢獻社會，造福人類，榮神益人。 至於我個仔將來會唔會成為有才德之士咁就好似下期六合彩派彩號碼一樣都係未知之數。 可能由於‘我冇我都想我下一代有’這個美好傳統思想‘作祟’，你會時不時遇到一些小朋友竟然人仔細細已通曉八國語言、琴棋書畫、上高山落油鍋、出口成文，而且仍可以繼續不眠不休不吃不喝地不知不覺不偏不倚地學三學四講東講西。

諗真D，身懷‘百冇’的伯母又點會有咁多資源去制造咁多小天材。 原來我這個‘我冇我都想我下一代都有’嘅先入為主嘅諗法係有天然破綻，why? 大家諗一諗如果上一代真係‘冇’嘅話又點可以令到下一代變成‘有’呢? 此有兩大學術範疇拾卜(support); 從經濟學角度思考，由99 變成 100 (傳承加壯大) 點都易過由 0 變到 1 (無中生有加創造)，再加上從物理學角度出發，從真正‘冇’嘅狀態到真正‘有’嘅狀態本身都已經虛幻過無線三十年前播映嘅幻海奇情 (就算有都係萬中無一! )。 或許‘我冇我都想我下一代有’係真正係‘百冇’嘅伯母嘅啊 Q 理想而已。 所以‘我冇我都想我下一代有’可能只是一種文學修辭嘅手法 (具陶冶性情、美化人格效果，值得推崇)。

而顧‘名’思義，大家會唔會從下一代的名字得出以下有力的結論　－　下一代的名字、上一代的不是; 或下一代的名字、上一代的不智或; 下一代的名字、上一代的反智！或下一代的名字、下一代的反思，如此思路推進，不難再推演更多鮮為人知的大發現 (冷知識! )。

望文生義，所以你可試試想像一下: 如意、如花、堅強、美麗、富貴、永安、吉祥、富貴、無忌等…… 從這些名字不難發現他們父母背景的蛛絲馬跡 (並無貶義之意)? 這裡我有兩個典型案例; 一) 叫‘無常’的爸媽本身的生活特徵 (或形態) 極有可能是很‘時常’、‘通常’、‘平常’、‘常常’以至‘尋常’，但相信他們不會是‘失常’及‘反常’; 二) 叫‘無忌’的爸媽極有可能本身有很多‘禁忌’進而‘猜忌’所以經常要‘避忌’一下，因此做人唔駛咁‘驟忌’！ 而我，承接上文，個仔叫彥呈，簡單一句，因為我本身沒有‘彥’所以係冇‘彥’可‘呈’(非不為也，實不能也! 亦是非戰之罪!)。 中國人取名真的別有一番韻味。

一人有一個夢想，二人同行食甜醬，除了馬丁路德金外，我都有一個夢 (英文版本更豪邁 I have a dream ! you see!)，是的，我希望有‘彥’的人會越多越多，我更希望有‘彥’而又願意‘呈’ 的人將更多。

註釋:
‘百冇’即身懷無物、身無分文或物質匱乏的生活狀態